لنتفق على بعض المبادئ, لو مش متفق, يبقى متكملشي أحسن!
لنتفق إن مبارك رئيس فاسد قامت ثوره راح ضحيتها شهداء من أفضل شباب مصر علشان تطيح بالنظام الفاسد كله و مش مبارك بس.
لو مش موافق على كده, روح يابني إنتخب اللي إنت عاوزه, اختار شفيق و موسى و زود عمر سليمان كمان.
نرجع بقى لأحمد شفيق.
بغض النظر عن كونه رئيس وزراء مصر وقت موقعة الجمل, و اللي سقط فيها شهداء كثيرين أظن إنه مسئول عن دماءهم. أحمد شفيق من وجهة نظري سياسي فاشل, و هذه أسبابي:
1.
أحمد شفيق هو صاحب أسوء تصريح للإعلام من رئيس وزراء مصري. و ده كان في حوار ليه مع "سي إن إن".
السؤال ببساطه من مذيعة سي إن إن:
كاندي: لماذا تعتقلون ناشطي حقوق الإنسان و صحفيين؟
كاندي: لماذا تعتقلون ناشطي حقوق الإنسان و صحفيين؟
الإجابة بعد إلقاء السؤال كذا مرة و ترجمه حرفية:
شفيق: آه, بصراحه, لو في أي مشكله, فهي غير مقصودة على الإطلاق يا عزيزتي.
أولا: "لو في أي مشكله"؟ هل دي إجابة بتأكد إنك بتعتقلهم؟
ثانيا: "غير مقصود" هو إيه اللي غير مقصود؟ إنك تعتقلهم من أصله ولا علشان سعتك غلط و إعتقلت خواجات؟ لكن المصريين عادي, دول بتوعنا.
ثالثا: "عزيزتك"؟
للأسف, رد شفيق لم يكن فقط رد غريب, لكنه يفتقد الصراحة, يفتقد السياسة, و يتسم بالكذب و الخوف من عواقب السؤال (الخارجية).
تقرير سي إن إن كامل: http://youtu.be/wM0jq84HMJo
2.
تصريحات أحمد شفيق قبل تنحي مبارك تنم عن:
ا. تكبر و عدم الإعتراف بالاخطاء (في اكثر من موقف يدافع عن خطابات الرئيس و كأنه وحي): http://youtu.be/qpYxEZGvNkk
بـ. استهزاء بالثوره (بنبوني و تعليقه عليها إنها حركه): http://youtu.be/AXyBz1Sgv18
ج. نرفزه و خروج عن الوعي وظهرت بوضوح في حواره مع علاء الأسواني. هذا ليس طريقة حوار سياسي. و الفيديو على يوتيوب.
3.
في حوار له قبل الثوره, قال شفيق إنه لا يجوز عزل مبارك و اسقاط المجالس (شعب و شورى) لأنه غير دستوري. مع إنه نفع أهو!! ده معناه:
ا. لم يكن يعلم و هذا هو تقديره أو فهمه. وده إن دل على شيء, فيدل إنه كان بيفتي.
بـ. يا إما كان عارف إنه ينفع خصوصا إنها ثوره بس بيكدب و يضلل علشان يحاول يخلق مشكله دستورية.
في كلتا الحالتين, تصرفه خطأ!
إذا, لماذا شفيق رئيسا لمصر؟
1. لأنه ذات خبره ناجحة.
مش عارف بالظبط فين الخبره الناجحه كرئيس وزارة, ده فشل ورا فشل! موقعة الجمل, مجبشي أي حق من حقوق الشهداء, مشفناش نتيجة تحقيق, عدم تمالك أعصابه تحت ضغط, مليونيه علشان يمشي هو و حكومته!! هو في أكتر من كده؟!
2. علشان كان ناجح قبل ما يبقى رئيس وزارة, و هو ملحقشي أو مخدشي فرصته.
أولا, متهيألي هو أخد فرصته و إن كانت دي حاجة نسبية من شخص لشخص. اسبابي اللي فوق بتقول إني حكمت عليه من اختيارات هو عملها و كان عنده فرصة يتصرف أحسن من كده فيها.
و بعدين هو جمال مبارك أخد فرصته؟ محنا مشفناش منه حاجة وحشة صريحة. ليه مجربناش جمال مبارك؟ و أهو يمكن عنده خبرة سياسية أكتر من شفيق كمان. طب بلاش جمال, علاء؟
السبب هو التكرار. طبيعي جدا إنك لما تكون شفت فرعون فاسد, مش عاوز تجيب واحد تاني لو في إيدك اختيار من اللي حوالين الفرعون الفاسد.
قبل مخلص, ارجوكم افتكروا شهداء ثورتنا, و متضيعوش دمهم هدر.
No comments:
Post a Comment