Feb 25, 2011

الشفافية و الإشاعات

وأنا صغير كنت أسمع كلمة الشفافيه, أول حاجة تيجي في بالي هي حصة الرسم! وده إن دل على شيء, فطبعا يدل على الموهبة الفذة اللي كنت بتميز بيها عن زمايلي في الرسم ( أو في الشف)! بس الأهم كمان إني مكنتش أعرف يعني إيه شفافيه, ولا كل الولاد أو البنات اللي في سني.

كبرت الحمد الله (وأزعم إني عقلت) ونسيت حصة الرسم, ولقيت مش بس أنا اللي مش عارف يعني إيه شفافيه, لأ ده كتير زيي والحكومه نفسها يا إما مش عارفين, يا إما بيستعبطوا الصراحة!

يعني مثلا مثلا, قريتوا كام مره أو سمعتوا في الأخبار "جهة مسئولة تحقق أو تبحث" أو "مصدر امني أو مصدر مسئول صرح" أو "قررت اللجنة"... إلا هي مين الجهة المسئولة دي؟ سر يعني؟ اسمها إيه يعني؟ طب عنوانها إيه طيب؟ يعني لو حد عنده معلومة مثلا, أو حتى عاوز معلومة, يروح فين يعني من الآخر؟
و مين مصدر مسئول ده كمان؟ ومسئول عن إيه يعني؟ إنه يدي أخبار؟ و على أي أساس بقى مسئول؟ مين اللي اداله المسئوليه؟
بيفكرني بمسرحية محمد صبحي: "أنا قررت ألغي كلمة الوزارة, وهاسميها المسئوليه! ليه؟ مش عارف! بس علشان كل الناس مسمياها وزارة, محبش يتقال إني بقلد حد!!"

وبعدين واضح إن الموضوع ده عملنا احنا كمصريين عقده... تسمع كتير كلام عام كده... مش محدد...  يعني تلقينا بنتكلم عن ناس مش معروفة, اشباح على رأي إبراهيم عيسى, بنعملها ونصدقها... "أصله بيقلك", "اصلهم خدوه", "أنا سمعت... " "الناس دي أصلها....", "هيهجموا علينا"... إلخ إلخ...
هو مين اللي بيقولي؟ و مجاش قال لي ليه على طول؟! قالك إنت ليه يعني؟ وبعدين إنت أي حاجة تسمعها تيجي تقلهالي؟ افتكر إنها حاجة سر؟! و سمعت فين؟ واللي سمعت منه ده سمع من مين؟ مين المصدر؟ فين المنبع؟!
و متهيألي بطريقة غريبة ابتدينا نحس إن الجهة المسئولة دي و المصدر الأمني بيعملوا كل حاجة, وكأنهم مش بني ادمين زينا كده... كأنهم قوة خارقة لقوانين الطبيعة.

و أحد الأعراض الجانبية كمان ... تلاقي حد بيكلمك يقلك "الناس كلها كذا كذا"...
فعلا؟ الناس كلها بتقول كده؟ كلمتهم إنت كلهم؟ مفيش ولا واحد بيقول حاجة تانية؟ ولا واحد؟

بعد كده, مفيش حاجة اسمها اشباح, مفيش حاجة اسمها "واحد" أو "بيقلك", مينفعشي ننشر معلومة مش واثقين منها 100%! مين المصدر؟ وهل فعلا ده كلام معقول ولا لأ؟ وليه ننشره؟ ليه فايدة ولا ملوش؟



لو مش واثق من معلومه ياريت متقلهاش على إنها حقيقة واقعه... يا ريت كلمة "متهيألي" أو "في رأيي" أو "أنا شايف" أو "أنا بفكر في", بتفرق كتير جدا مع الناس البسيطة اللي زيي إنها تعرف إن دي وجهة نظر ولا حقيقة علمية مثلا!

No comments: